الشاعر علي زايد مرتاح البال مصر 🇪🇬

 

مرتاح البال

عايز تعيش مرتاح البال

اياك تكون فى دنيا عنيد

بلاش تسلم للأحزان

وخلي فكرك عالي رشيد

حرص من صاحبك وخاويه

وعدوك يبقى قريب وبعيد

خليك لَيّن مع أهلك

وبلاش تبقى عنيد وشديد

واكرم ضيفك وحبايبك

أيد جارك فى الخير تأيد

طلع دنياك من قلبك

خاينة الدنيا ما فيها مفيد

أمسك حبل الدين صدقني

قلبك هينور ويقيد

اليوم يعدي بمشاكله

وأبدأ يوم بالحب جديد

أبعد بعيد أوعى تقرب

عن اللي عقلك بيه هيغيب

أجبر بخاطر العشمان

وكن لجراحه دوا وطبيب

وأبعد عن صاحب خاين

علطول فى ضهرك بيعيب

أما الاصيل تلاقيه وياك

بعيد لو كنت ولا قريب

أختار خليلك بعنايه

علشان على بعض انتم محاسيب

وافرح بشبابك واغتنمه

قريب قوي هتروح للشيب

وشيبتك تبقى عليها حريص

إياك تكون من المعاييب

ضيوف ع الدنيا ومَسّكين

وغصب عنا ف يوم هنسيب

بعها قبل ماهى تبيعك

واعمل ليوم الدين ترتيب

الشاعرعلى_زايد