حصريا : القول الفصل فى المسألة الحوثية
ربنا بيسلط أبدان على أبدان
هل اللعب الجاى هيكون بين الحوثى وإسرائيل
على مسئوليتى الشخصية
■هو ترامب بيتكلم بجد لما قال إن الحوثيين بلغوه إنهم مش هيضربوا إسرائيل تانى لو هو وقف ضرب!
■ هما الحوثيين بجد كده إستسلموا ؟
■ جهز كده بقا فنجان قهوتك التمام وتعالى معايا
فى البلكونة فى الهواء الطلق
■ بص يا فندم الحوثيين دوول هما أهم ذراع أمنى لإيران .. أكتر ناس متسلحين من إيران، أكتر ناس إيديها طالت إسرائيل لدرجة إن صواريخهم فعلاً هددت العمق الإسرائيلى بلغة أجهزة الإستخبارات!!!
■عشان كده الأمريكان دخلوا فى الليلة الكبيرة دى، وإتمركزوا فى البحر الأحمر عشان بس يهدوا الحوثى لإنهم أثروا على السفن الأمريكية التجارية والعسكرية بهجماتهم عليها وخلوا ٦٠٪ من السفن التجارية حول العالم تفكها من طريق البحر الأحمر وتطلع تطوف وتشوف حول إفريقيا فى طريق رأس الرجاء الصالح وده طبعًا خرب بيتنا إحنا لإن مصر فقدت نص إيرادات قناة السويس بسبب الحوثيين!!!
■وعشان كده ترامب قالك إن مصر لازم تعدى سفنى ببلاش لإن ضرباتى ع الحوثيين هترجع الثقة تانى فى البحر الأحمر كممر ملاحى والمصريين هيستفيدوا
■ السيسى طبعًا نفض له وكان ده أفضل رد على كلام المعاتيه زى أبو حنان أو الترومبيطة ، وشوف يا أخى يشاء السميع العليم إن الحوثيين يضربوله سفن تانية ومعاها طائرة مقاتلة من طراز إف ١٨
■ ترومبيطة قالك وأنا هواجه لوحدى الحوثيين، هووووب بريطانيا دخلت فى الليلة مع الأمريكان
■ أنت متخيل يعنى البحر الأحمر موجود فيه أمريكا وبريطانيا عشان بس الحوثى
■ فقامت الحوثى بتوجيه صواريخ لمطار بن جوريون خلت البورصة فى إسرائيل ترتعش وسط مؤشرات بضرب السياحة فى إسرائيل
■ طيب ما كده اليهود حسوا إن الأمريكان والبريطانيين مش عارفين يحموهم ويوقفوا الحوثيين
■ الله عليك شكل فنجان القهوة ظبط الجمجمة، وعشان إللى أنت قولته ده بقا، إسرائيل قالت تقوم هى بالرد، والرد بقا لازم يليق بمستوى ومكانة إسرائيل إللى عايزة تروج لها كقوة رادعة فى الشرق الأوسط!!!
■وهووووب ولاد عمك قصفوا ميناء الحديدة ومصنع باجل للخرسانة والأسمنت، وهنا بقا نسأل نفسنا ليه إسرائيل عملت كده ؟!!!
■أقولك بقا، كمل بس فنجان قهوتك وصحصح معايا!!!• ولاد عمك ضربوا ميناء الحديدة عشان ده تانى أكبر ميناء فى البحر الأحمر بعد ميناء عدن!!!• ميناء الحديدة بيشكل ٨٠٪ من الموارد الإقتصادية لليمن والحوثيين!!! • ميناء الحديدة هو إللى من خلاله بيتم نقل الأسلحة من إيران للحوثيين!!!
• مش بس كده أقولك على الثقيلة بقا!!!
• أنت عارف المصنع إللى إتضرب ده هو إللى كان من خلاله بيتعمل الأنفاق إللى الحوثيين بيستخدموها لصالحهم فى نقل الأسلحة!!!
• وكمان بيتعمل منه بناء البنية التحتية العسكرية للحوثيين!!! • عشان كده إسرائيل هدت القوة الإقتصادية والعسكرية للحوثى فى أول رد منهم على الحوثيين وده فى حد ذاته تسويق لقدرة إسرائيل، هما قاصدينه، وده كان السبب فى تصريح ترامب بإستسلام الحوثيين!!! • هما ماستسلموش بمعنى الكلمة إنما ع الأقل أقدر أقولك إنها هدنة ناتجة إن اسرائيل قدرت تردعهم
و الأكيد إن الحوثيين أخدوا الأمر من إيران أسيادهم إللى بيمولوهم إنهم يوقفوا الضرب عشان خاطر مايرموش بأيديهم إلى التهلكة وكمان عشان توقيت مفاوضاتهم مع الأمريكان بخصوص النووى
هو أنت مالك فرحان ليه من إسرائيل فى مقالك ده ؟
أنت إسرائيلى ولا إيه
كنت عارف إنك ممكن تقول كده عشان إحنا كثير مننا إتعود يصنف غيره وقليل جدًا إللى بيتكلم بحيادية، أنا بجانب مهامى القتالية، متخصص علوم سياسية، مش شعارات فارغة، وعشان كده بوضحلك حقيقة الأمر إللى ممكن ناس كثير تخاف تعرفهولك أو ربما ماتقدرش!!! • طيب هل الهدنة دى ممكن تشجع على هدنة فى غزة ؟
نفس السؤال إللى إتسألته إمبارح، وكان ردى إنه للأسف الهدنة دى هتقوى إسرائيل أكتر فى إللى بتعمله وتوقيتها خطير لإن إسرائيل إستدعت قوات الإحتياطى عشان بتحضر لأكبر عملية توغل برى فى غزة، هيبيدوا فيها أكبر قدر من الفلسطينيين وهيجبروهم علي الخروج!!!
• إسرائيل بتقصقص جناحات إيران وبتحقق خطوة كبيرة فى حلم الدولة اليهودية إللى 7ماس إديتلهم الفرصة لتحقيقه على طبق من ذهب
دى الحقيقة، ده الواقع إللى للأسف ما يعرفش إلا القوة و زى ما قولت قبل كده، إن فى السياسة لو إمتلكت القوة إمتلكت التأثير، وإذا لم تمتلك القوة فستدفع ثمن الضعف!!! …..ومن زمان قالها السيسي صقرنا الذهبي حفظة الله
( القوى محدش يقدر يأكل لقمته)
خلص الكلام
0 تعليقات